Летото на северната полутопка официјално започнува денес, 21 јуни, со што настапува и најдолгиот ден во годината. Во исто време, на јужната полутопка започнува зимата.
Со почетокот на летната сезона, Сонцето го достигнува својот највисок дневен пат над хоризонтот. Тоа изгрева на североисток, а заоѓа на северозапад, поради што денот е најдолг, а ноќта најкратка во текот на годината.
Астрономите објаснуваат дека Сонцето денес се наоѓа во точката на летниот сонцестој, кога привидно изгледа како неколку дена да „стои во место“, бидејќи неговата висина околу пладне речиси и не се менува.
Летната сезона ќе трае 93 дена, 15 часа и 40 минути и ќе заврши на 23 септември, кога официјално започнува есента.
По денешниот ден, дневната светлина постепено ќе почне да се намалува, сè до 21 декември, кога започнува зимата и кога ќе настапи најкраткиот ден во годината.
