Германија и Италија денеска се соочуваат со екстремно високи температури, додека топлотниот бран, кој се поврзува со десетици смртни случаи во Западна Европа, продолжува да се движи кон исток.
Велика Британија, Франција, Швајцарија и Германија веќе регистрираа рекордни јунски температури, а метеоролозите предупредуваат дека нови рекорди се можни, додека топлиот воздушен бран се движи кон Полска.
Во близина на германскиот град Сарбрикен, во близина на француската граница, вчера била измерена температура од 41,3 Целзиусови степени, што би можело да претставува нов национален рекорд, соопшти германската национална метеоролошка служба.
За речиси цела Германија се издадени предупредувања за екстремни горештини, а граѓаните се повикани рационално да ја користат водата. Во делови од земјата се очекуваат температури и до 42 степени.
Франција, пак, веќе бележи десетици смртни случаи поврзани со високите температури. Горештините предизвикаа нарушувања во железничкиот сообраќај и во производството на електрична енергија, а во некои делови беа затворени училишта и одложени настани на отворено.
Италијанското Министерство за здравство издаде црвено предупредување за 18 градови, меѓу кои Рим, Милано, Торино, Венеција, Фиренца и Болоња. Во одредени региони температурите би можеле да достигнат и до 39 степени.
Поради екстремните временски услови, германскиот железнички оператор „Дојче Бан“ им овозможи на патниците бесплатно да ги откажат резервациите за патувања на долги релации, предупредувајќи дека железничката инфраструктура е под сериозен притисок.
Метеоролозите очекуваат најсилниот бран на горештини постепено да почне да слабее во текот на викендот, кога во делови од Европа се прогнозираат и силни грмежи и невреме.
Научниците предупредуваат дека ваквите екстремни топлотни бранови се значително засилени поради климатските промени предизвикани од човекот.
