Жител на населбата Ново Лисиче повторно реагира за состојбата со преполните контејнери и натрупаниот отпад во близина на неговото живеалиште, откако, како што тврди, и по неколку дена од првата објава проблемот сè уште не е решен.
Пред пет дена тој преку социјалните мрежи упати критика до надлежните институции, посочувајќи дека покрај преполните контејнери се создаваат купови ѓубре.
„Поздрав до градоначалниците на Општина Аеродром и Град Скопје. Депонијата, џунглата и сламата кога ќе бидат средени? Само што не дошле: глувци, диносаурси и говеда“, напиша жителот во својата објава.
Денеска тој повторно се огласи, наведувајќи дека состојбата останала непроменета и покрај неговата претходна реакција.
„По неколку дена од објавата ништо не е сменето. Депонијата, сламата и тревата од 2 метри сè уште се таму“, напиша тој.
Жителот ги повика надлежните од Општина Аеродром и Град Скопје да преземат мерки за расчистување на отпадот и уредување на просторот, со цел да се подобри хигиената и безбедноста во населбата.
