Депонијата „Краста“ под засилен надзор, ќе се формира еко-патрола од локалното население

Општинскиот штаб за заштита и спасување во Куманово одржа состанок за актуелната состојба на депонијата „Краста“, на кој беа донесени повеќе заклучоци за нејзино деблокирање, непречено одлагање на сметот и засилен надзор.

На состанокот, на кој присуствуваа претставници на надлежните институции, јавните претпријатија, полицијата, инспекциските служби и здравствените установи, беше побарано сите институции, во рамките на своите надлежности и во меѓусебна координација, да ги преземат законските мерки за деблокирање на депонијата.

— реклама —

Од МВР – СВР Куманово се бара да постапи по барањето на ЈП „Чистота и зеленило“ за координација и отворање коридор до депонијата, со цел да се овозможи одлагање на отпадот од градот.

— реклама —

Еден од заклучоците предвидува континуирано присуство на градежна механизација на депонијата, при што ЈП „Чистота и зеленило“ треба да го третира депонираниот отпад со земја. Дополнително, на дневна основа треба да се обезбедува градежен материјал, вклучително и земја и несогорлив шут од ископ, кој ќе се разастира врз отпадот донесен во текот на денот.

За да се подобри контролата, предвидено е поставување дополнителни камери за видеонадзор, кои ќе ги покриваат влезот, излезот и пристапот до депонијата. Ќе се поставуваат и термовизиски камери за дополнителен мониторинг, а ќе се зајакнат и стражарските служби и физичкото обезбедување за да се спречи влез на неовластени лица.

— реклама —

Меѓу заклучоците е и санација на оштетените делови од заштитната ограда, како и поставување нова ограда на местата каде што ја нема.

Центарот за јавно здравје – Куманово треба да изготви информација за актуелната состојба и да даде насоки за превентивно дејствување, со цел да се спречат можните последици од нередовното собирање и депонирање на сметот на територијата на општината.

Предвидено е и формирање мониторинг-група, односно еко-патрола, во соработка со месното население. Во неа треба да учествуваат претставници на месните заедници и невладините организации од селата Пчиња, Студена Бара, Вак’в и Винце, кои заедно со претставници на ЈП „Чистота и зеленило“ ќе вршат неделен мониторинг на состојбата на депонијата „Краста“.