Шведска најави дека ќе се спротивстави на секој обид за слабеење на европскиот систем за тргување со емисии (ETS), во пресрет на новите разговори меѓу земјите членки за иднината на една од најважните климатски политики на Европската Унија.
Шведската министерка за европски прашања, Џесика Розенкранц, изјави дека нејзината земја ќе се бори системот да остане непроменет и да продолжи да ја исполнува својата улога во намалувањето на емисиите на јаглерод диоксид.
„Додека некои земји членки се обидуваат да го ослабат најефикасниот европски климатски инструмент, нашиот став е јасен – ќе се спротивставиме на секој обид за негово ублажување“, изјави Розенкранц.
Системот ETS поставува ограничување на дозволените емисии, а најголемите загадувачи во Европската Унија плаќаат за секој тон јаглерод диоксид што го испуштаат. Тој ги опфаќа индустријата, енергетиката, воздушниот и поморскиот сообраќај.
Европската комисија во текот на овој месец треба да ја претстави ревизијата на системот и да одлучи дали ќе ги задржи сегашните правила или ќе ги ублажи под притисок на земјите што сметаат дека тие ја оптоваруваат индустријата и ги зголемуваат трошоците за граѓаните.
Според „Политико“, десет европски земји, меѓу кои Полска, Италија, Чешка и Австрија, се залагаат за олеснување на правилата. Од друга страна, Шведска предупредува дека таквиот потег би бил штетен и за климата и за конкурентноста на европската економија.
Во меѓувреме, Ирска, која од 1 јули претседава со Советот на ЕУ, ќе има задача да посредува во постигнувањето компромис меѓу земјите членки. Шведска бара да се задржат постојните правила, но и системот да се прошири со вклучување на согорувањето на отпад и на бродови поголеми од 400 бруто тони.
Покрај Шведска, поддршка за зачувување на сегашниот модел на ETS изразија и Шпанија, Финска, Холандија, Португалија и Луксембург.
