Дете со искршени заби по напад од група малолетници во Влае - нов ужасен случај на врсничко насилство

Тринаесетгодишно дете било претепано од група малолетници во скопската населба Влае, дознава „Скопје1“. Според информациите до кои дојде редакцијата, во нападот учествувале околу 15 малолетници, а детето се здобило со сериозни повреди, меѓу кои и искршени заби. Во настанот, според сведоштва, детето било тепано со метал.

Нападот се случил во саботата на плоштадот „Делфина“, околу 00:30 часот, а истиот ден во 15:30 часот случајот во полиција го пријавила мајката на нападнатото дете.

„На 18.10.2026 во 15:30 часот во СВР Скопје 39-годишна жена пријави дека околу 00:30 часот на подрачјето на Влае нејзиниот малолетен син бил физички нападнат од група малолетници од кои некои од нив ги познавал, а бил употребен и тврд предмет. Се преземаат мерки за расчистување на случајот“, велат од МВР за „Скопје1“.

— реклама —

Полицијата го потврдува нападот и употребата на тврд предмет, но во официјалниот одговор не го наведува точниот број напаѓачи, ниту степенот на повредите. Според неофицијални информации од МВР, веќе дел од децата кои се сомничат дека го сториле насилството - се повикани во станица.

Случајот следува по неколку други напади врз малолетници во Скопје. На 9 октомври, во доцните вечерни часови, малолетник бил физички нападнат од група врсници во двор на основно училиште на подрачјето на Бит-пазар. Еден од напаѓачите го снимал насилството со мобилен телефон, а снимката потоа била објавена на социјална мрежа. Настанот бил пријавен во полицијата на 15 октомври.

— реклама —

Претходно, на 3 октомври, на детско игралиште во Карпош, петмина малолетници нападнале друго момче. Двајца од напаѓачите му биле познати на нападнатиот, а случајот бил пријавен во СВР Скопје на 8 октомври.

На 2 октомври, во училишен двор во Ѓорче Петров, според полициската пријава, четворица малолетници физички нападнале група деца. Еден од напаѓачите носел остар предмет, но МВР не соопшти дали предметот бил употребен, ниту дали имало повредени.

Тешко повредено дете имаше и во друг напад во Ѓорче Петров, пријавен на 16 септември. По претходна расправија во двор на основно училиште, малолетник бил нападнат од неколку врсници, при што се здобил со тешки телесни повреди.

— реклама —

Во јавноста претходно одекна и случајот со 13-годишно девојче од Ѓорче Петров, кое било физички нападнато во два одделни настани на 27 и 30 март. Фотографии и видеоснимки од насилството биле објавени на социјалните мрежи. Полицијата поднесе кривични пријави против четири малолетнички, а потоа и шест кривични пријави против нивните родители за сомнение за запуштање и малтретирање дете.

Еден од најтешките случаи се случи на 31 август во скопски Чаир, кога 13-годишно момче беше прободено со нож во пределот на срцето при пресметка меѓу две групи. Во постапката против осомничените беше определен притвор за 19-годишник, додека во инцидентот учествувал и неговиот 13-годишен брат.

Во март беше пријавен и напад врз малолетник во парк во Ѓорче Петров, каде што, според пријавата, момчето било физички нападнато од друг малолетник.

Повторувањето на вакви инциденти, во училишни дворови, паркови, игралишта и населби, повторно го отвора прашањето за безбедноста на децата и постапувањето на институциите по пријавите за врсничко насилство.

За последниот напад во Влае засега нема официјални информации за причините, ниту дали се идентификувани сите учесници. Од МВР информираат дека преземаат мерки за расчистување на случајот.