Поскапувањето на дизелот на над 100 денари за литар претставува ново оптоварување за граѓаните и земјоделците, оцени потпретседателката на СДСМ Јована Тренчевска на денешната прес-конференција.
Според неа, дизелот за само шест месеци поскапел за 43 отсто, а повисоките трошоци за гориво ќе имаат последици и врз производството и транспортот, што, како што предупреди, ќе доведе до ново зголемување на цените на храната.
Тренчевска посочи дека во услови кога потрошувачката кошничка е речиси 70.000 денари, а платите стагнираат, секое ново поскапување дополнително го оптоварува семејниот буџет.
„Над 100 денари за литар дизел значи нов ценовен удар врз секое македонско семејство. Поскапото гориво значи поскап транспорт, поскапо производство и на крајот – поскапа храна“, рече Тренчевска.
Таа особено се осврна на состојбата во земјоделството, каде, според неа, зголемените трошоци за гориво, ѓубриво и наводнување дополнително ги притискаат производителите.
Тренчевска посочи и на протестите на земјоделците поради откупните цени на пиперката, обвинувајќи ја Владата дека не ги исполнила ветувањата кон производителите.
„Земјоделците не живеат од прес-конференции и ветувања. Живеат од цената на својот производ, од сигурен откуп и навремена исплата“, изјави таа.
Од СДСМ велат дека Владата треба да обезбеди откупна цена повисока од 50 денари за килограм, имајќи ги предвид зголемените трошоци за производство.
Тренчевска предупреди дека продолжувањето на ваквите трендови може да влијае и врз домашното производство и прехранбената сигурност, со зголемување на зависноста од увоз.
„Македонија има земја, вода, сонце, традиција и вредни земјоделци. Можеме да произведуваме храна и за себе и за регионот“, порача таа, повикувајќи ја Владата итно да преземе мерки за заштита на стандардот и поддршка на земјоделците.
