(Видео) Тренчевска: ПИОМ е пред колапс, дупката расте поради арамиите- поголеми придонеси не се решeние

Пратеничката и потпретседателка на СДСМ, Јована Тренчевска, на прес-конференција предупреди на, како што оцени, сериозно влошување на состојбата во Фондот за пензиското и инвалидското осигурување (ПИОМ).

Тренчевска рече дека дефицитот во ПИОМ достигнал околу една милијарда евра, што, според неа, претставува повеќе од 14 отсто од вкупниот државен буџет. Таа посочи дека состојбата дополнително се влошува и покрај зголемувањето на придонесот за ПИОМ за еден процентен поен од 1 јули, преку пренасочување на средствата што претходно оделе во Агенцијата за вработување.

— реклама —

Според Тренчевска, последните анализи на Фискалниот совет укажуваат дека дефицитот во наредните години може да достигне 1,3 милијарди евра.

„Исплатите на пензиите на сегашните и идните пензионери се во ризик“, рече Тренчевска.

— реклама —

Таа се спротивстави и на најавите за дополнително зголемување на придонесите за пензиско осигурување, оценувајќи дека тоа би создало дополнителен трошок за работодавачите и би можело да влијае врз нето-платите на работниците.

Тренчевска оцени дека решението не треба да се бара преку дополнително оптоварување на граѓаните и компаниите, туку преку намалување на други државни трошоци.

— реклама —

Таа ја обвини Владата и дека размислува да посегне по средствата од вториот пензиски столб. Според Тренчевска, образложението за таков потег се поврзува со инвестиции, но таа предупреди дека со тоа, како што рече, може да биде загрозена заштедата на граѓаните наменета за нивната идна пензија.

„Граѓаните кои со години уплаќале може да останат без својата заштеда и без важна потпора за идната пензија“, рече Тренчевска.

— реклама —

Од СДСМ повикаа Владата да не ги зголемува трошоците за пензиските придонеси и да не ги користи средствата од вториот пензиски столб, туку да ги намали, како што наведуваат, трошоците за луксуз и да преземе мерки за намалување на дефицитот во ПИОМ.