До 15 часот денеска на територијата на државата се регистрирани вкупно пет пожари на отворен простор, од кои три сè уште се активни, а два се целосно изгаснати.
Според информациите од надлежните служби, активни се пожарите во Општина Пробиштип, кај селото Петршино, каде што гори ниска вегетација, во Општина Свети Николе, на потегот меѓу селата Делисинци и Сарамзалино, каде што исто така е зафатена ниска вегетација, како и во Општина Богданци, покрај локалниот пат Богданци – Стојаково, каде што гори ниска вегетација.
Во меѓувреме, целосно се изгаснати пожарот во Општина Ранковце, кај селото Вржогнци, каде што биле зафатени автомобил и стрниште, како и пожарот во Општина Сарај, кај селото Грчец, каде што горела ниска вегетација.
Надлежните служби и понатаму ја следат состојбата на терен и преземаат активности за локализирање и гаснење на активните пожари.
