До 18 часот денеска во земјава се регистрирани 22 пожари на отворен простор, од кои 8 се активни, еден е ставен под контрола, а 13 се целосно изгаснати, информира Центарот за управување со кризи.
Најголем дел од активните пожари зафаќаат ниска вегетација и шумски површини. Во Општина Прилеп активен е пожарот на потегот од село Чаниште кон Крушевица и Лопатица, со крак кон Црна Река. Пожари има и кај селата Белушино и Јакреново во Крушево, каде што гори ниска вегетација и деградирана дабова шума.
Активни се и пожарите во Студеничани, на потегот Моране – Вртекица – Рамни Габер, во Бутел кај Луботен, како и во Македонски Брод, на местото Видуш, кај Драгов Дол и кај Локвица.
Во Кичево гори високостеблеста букова шума кај Тајмиште, на местото Дарда, додека активни пожари има и кај Никуштак во Липково и кај Церово во Гостивар, каде што е зафатена нискостеблеста дабова шума.
Пожарот кај селото Мојно во Општина Могила е ставен под контрола.
Во текот на денот се изгаснати вкупно 13 пожари. Тие биле регистрирани во Радовиш, Струмица, Новаци, Гостивар, Брвеница, Неготино, Велес, Струга, Дебар, Кичево, Куманово и Студеничани. Во најголем дел гореле ниска вегетација, стрништа, грмушки и отпад, а на едно место бил зафатен и објект – плевна на Дебарските гробишта.
