Илјадници овци веќе се уништени или угинати поради ширењето на овчите и козјите сипаници, а Владата наместо со буџетски средства веднаш да обезбеди вакцини, сè уште очекува најавена донација од Турција и дополнителна помош од Европската Унија, реагира Левица преку соопштение.
Од партијата велат дека дополнителен проблем е тоа што нема прецизен рок кога вакцините би пристигнале, а дури и по нивното доставување, дозите треба да поминат проверки за безбедност, квалитет и ефикасност пред да започне нивната употреба. Во меѓувреме, заразата продолжува да се шири, а сточарите остануваат без цели стада и без сигурност за својата егзистенција.
Според податоците што ги наведува Левица, досега се уништени или угинати околу 10.000 овци, регистрирани се повеќе од 50 жаришта, а над 100 одгледувачи во источниот дел од земјата ги загубиле своите стада. Во Штипско, проценките се дека болеста зафатила меѓу 70 и 80 отсто од овчарскиот фонд.
Од партијата посочуваат дека последиците не се ограничуваат само на моменталната загуба на животните, бидејќи сточарите остануваат без основен извор на приходи, а обновувањето на стадо кое се создавало со години не може да се реши само со еднократен надомест поради евтаназија.
Левица обвинува дека надлежните институции имале предупредувања за опасноста уште пред болеста да се прошири во Македонија. Како пример се посочува претходното ширење на болеста во Грција, кога домашните сточари, според партијата, барале навремена интервентна вакцинација, но вакцини не биле обезбедени.
Првиот потврден случај во земјата бил регистриран на 27 јануари во Кумановско. Иако во февруари Агенцијата за храна и ветеринарство информирала дека состојбата е ставена под контрола, во следниот период заразата се проширила во Свети Николе, Кочани, Радовиш, Штип и други места во источниот дел од земјата.
Левица дополнително реагира на ситуацијата во која дел од сточарите, поради стравувањата од ширење на болеста, започнале самостојно да набавуваат вакцини од Турција. АХВ потоа предупреди дека неовластената вакцинација е незаконска и може да влијае и врз правото на обештетување.
Од партијата прашуваат зошто државата не обезбедила навремена вакцинација, наместо сточарите сами да бараат решенија во странство.
Спорно е и најавеното обештетување од околу 100 денари за килограм, кое, според сточарите, не ја одразува реалната загуба. Во него не се опфатени целосно вредноста на приплодните грла, изгубеното производство и времето потребно за повторно формирање на стадо.
Левица бара Владата веднаш да набави вакцини со буџетски средства, да подготви јасен план и рокови за вакцинација, јавно да ги објави критериумите според кои ќе се спроведува имунизацијата и да обезбеди дополнителни ветеринарни екипи.
Од партијата бараат и реално обештетување за погодените сточари, како и утврдување одговорност за институционалното постапување досега.
„Ако Министерството продолжи со ова темпо, не е далеку ризикот кога конечно ќе пристигнат вакцините, веќе да нема доволно овчарски фонд што треба да се спасува“, предупредува Левица.
