„ДПМНЕ три години го крши Законот за субвенциониран студентски оброк - студентите оштетени за 6,5 милиони евра“, велат од Левица

Левица преку соопштение обвинуваат дека власта три години не ја спроведува законската обврска за усогласување на субвенционираниот студентски оброк со инфлацијата, со што, според нивните пресметки, студентите биле оштетени за околу 6,5 милиони евра.

— реклама —

На денешната прес-конференција, генералната секретарка на Црвена Младина, Марија Ванчева, посочи дека и покрај донесувањето на три годишни буџети, износот на субвенционираниот студентски оброк останал непроменет.

Од Левица тврдат дека Законот за субвенциониран студентски оброк предвидува износот да се усогласува со годишната инфлациска стапка пред донесувањето на буџетот за следната година. Според Ванчева, поради неизвршувањето на оваа обврска, секој студент во изминатите три години месечно добивал околу 650 денари помалку од износот што, како што велат, законски му следува.

— реклама —

„Иако поминаа три годишни буџети, мизерниот износ за субвенциониран студентски оброк остана ист“, изјави Ванчева.

— реклама —

Од партијата оценуваат дека проблемот не е само во висината на надоместокот, туку и во односот на власта кон студентите, особено во услови на раст на трошоците за живот и иселување на младите.

Левица ја обвинува власта дека нема јасна стратегија за подобрување на студентскиот стандард и за задржување на младите во земјата. Од Црвена Младина најавуваат дека работат на предлог за поефикасен модел на субвенционирање на студентскиот оброк.

— реклама —

Во меѓувреме, пратениците од Левица најавуваат итни измени на Законот за субвенциониран студентски оброк, со кои би се овозможило зголемување на износот што три години, според нив, останува непроменет спротивно на законската обврска.