Заменик-претседателот на Владата и министер за транспорт Александар Николоски, заедно со амбасадорот на Европската Унија во Македонија, Михалис Рокас, присуствуваа на промоцијата на нови возила и опрема за Државниот инспекторат за транспорт, донација од Европската Унија во вредност од 700.000 евра.
Николоски истакна дека донацијата значително ќе ги зголеми капацитетите на инспекторатот и ќе овозможи поефикасно спроведување на инспекцискиот надзор низ целата држава.
„Со оваа донација Државниот инспекторат за транспорт добива комплетно нова димензија. Инспекторите ќе можат целосно да ја покријат територијата на државата и да бидат присутни на секоја точка“, изјави Николоски.
Донацијата опфаќа 16 специјално опремени патнички возила, две возила за следење, специјално адаптирано комбе кое ќе служи како мобилен контролен центар, како и современ софтвер и обука за инспекторите.
Според министерот, новата опрема ќе овозможи подобра контрола на камионите со прекумерна тежина, превозот на опасни материи и автобускиот превоз, што ќе придонесе за поголема безбедност во сообраќајот и подобра заштита на патната инфраструктура.
Николоски нагласи дека инвестициите во патната инфраструктура мора да бидат проследени со ефикасен инспекциски надзор, за да се зачува квалитетот и долговечноста на патиштата.
Тој му се заблагодари на амбасадорот Рокас за поддршката во реализацијата на проектот и најави дека во втора фаза ќе следуваат дополнителни инвестиции за понатамошно јакнење на капацитетите на Државниот инспекторат за транспорт.
