Огромниот интерес за туристичката иницијатива „Dubai Invite“ го натера Дубаи да го прекине приемот на нови пријави, откако повеќе од 90.000 жители побарале да ги угостат своите пријатели и роднини од странство.
Програмата беше започната во јули со цел жителите на Дубаи да станат своеобразни амбасадори на градот, а на учесниците им се нудат погодности и попусти во вредност од повеќе од 3.000 дирхами, односно околу 700 евра.
Пакетите вклучуваат попусти за хотелско сместување, ресторани, превоз и туристички атракции, како и поевтини или бесплатни билети за некои од најпознатите места во Дубаи, меѓу кои водениот парк „Aquaventure“ и забавниот парк „IMG Worlds of Adventure“.
Од Одделот за економија и туризам на Дубаи соопштија дека поради исклучително големиот интерес, заедно со партнерите го зголемиле бројот на достапни пакети трипати. Сепак, по над 90.000 пристигнати барања, новите пријави се прекинати.
Програмата продолжува за оние кои навреме се регистрирале, а досега се доделени повеќе од 30.000 пакети со погодности.
Гостите чии пријави се одобрени мора да пристигнат во Дубаи најдоцна до 31 октомври годинава, и тоа директно од земја надвор од Обединетите Арапски Емирати. Домаќините ќе ги добијат погодностите во рок од 72 часа од пристигнувањето на гостите, а ќе можат да ги користат кај партнерите на програмата до крајот на годината.
Иницијативата е дел од напорите на Дубаи да го задржи растот на туризмот по рекордната 2025 година, кога градот го посетиле 19,59 милиони меѓународни туристи. Од туристичкиот оддел истакнаа дека огромниот одѕив покажува колку посетите на пријатели и роднини од странство се значајни за туристичкиот сектор.
Сепак, туристичката сезона во 2026 година се одвива во посложени услови поради ескалацијата на конфликтот меѓу САД и Иран, која влијае врз патувањата и воздушниот сообраќај во поширокиот регион на Заливот.
