Воздушната одбрана на Обединетите Арапски Емирати денеска регистрирала ракетна закана, што е прв ваков случај од мај годинава, соопшти Министерството за одбрана на земјата.
Во Дубаи се огласиле сирени за воздушен напад, а Министерството за внатрешни работи ги повикало граѓаните веднаш да се засолнат во најблискиот безбеден објект поради можна ракетна закана.
Од Министерството за одбрана на ОАЕ преку платформата X соопштиле дека сите експлозии што се слушаат се резултат на дејствувањето на системите за воздушна одбрана.
„Поради моменталната ситуација и можните ракетни закани, веднаш побарајте безбедно место во најблискиот безбеден објект“, се наведува во предупредувањето на властите.
Министерството за одбрана порача дека земјата е целосно подготвена да одговори на секоја закана и да ги заштити нејзиниот суверенитет, безбедност и стабилност.
Инцидентот се случува во период на зголемени тензии меѓу САД и Иран, додека состојбата околу Ормускиот Теснец дополнително се влошува. ОАЕ и претходно беа изложени на ракетни и беспилотни напади од Иран во периодот на ескалација.
Засега нема информации за евентуални жртви или материјална штета. Исто така, не е соопштено колку ракети биле откриени или пресретнати.
