ОАЕ потврдија: Копилот со секира го нападнал капетанот и се обидел да го преземе авионот, тоа бил планиран терористички напад

Копилотот на летот FZ1073 на „Флајдубаи“ планирал и почнал да извршува терористички напад за време на летот од Дубаи кон Тел Авив, официјално соопшти државниот обвинител на Обединетите Арапски Емирати, Хамад Саиф Ал Шамси.

Според досегашните резултати од истрагата, копилотот го нападнал капетанот во пилотската кабина со секирата за итни случаи што се наоѓала во авионот, а потоа се обидел да ја преземе контролата врз командите на леталото.

— реклама —

Инцидентот се случи на 30 септември на летот FZ1073 од Дубаи кон Тел Авив. Во авионот имало 174 патници, главно израелски државјани, како и членови на екипажот. Копилотот е државјанин на Оман, а Reuters објави дека станува збор за Хамам ал-Хамами. Емиратските власти првично не го потврдија јавно неговиот идентитет.

Нападнатиот капетан бил сериозно повреден, но успеал да ја отклучи вратата од кокпитот. Тоа овозможило интервенција на други лица во авионот и совладување на копилотот.

— реклама —

Во текот на инцидентот авионот почнал нагло да губи височина. Според Reuters, леталото се спуштило за илјадници метри за само неколку десетици секунди. На крајот контролата била воспоставена, а авионот бил пренасочен кон аеродромот во Табук, Саудиска Арабија, каде безбедно слетал.

Генералната управа за цивилно воздухопловство на ОАЕ претходно потврди дека во инцидентот биле повредени членови на екипажот и дека по принудното слетување биле пренесени во болница. Сите патници биле безбедни.

— реклама —

Емиратските власти денес првпат официјално го квалификуваа случајот како обид за терористички напад.

„Копилотот започнал со реализација на својот план за време на летот, го нападнал капетанот во пилотската кабина користејќи секира за итни случаи и се обидел да ја преземе контролата врз командите на авионот“, соопшти обвинителот Ал Шамси.

— реклама —

Истрагата продолжува за да се утврдат сите околности и мотиви, како и дали копилотот имал евентуални врски со други лица или организации. Се анализираат физички и дигитални докази, а конечните резултати ќе бидат објавени по завршувањето на постапката.

„Флајдубаи“ соопшти дека соработува со надлежните органи. Компанијата претходно потврди дека авионот безбедно слетал во Табук и дека сите патници се безбедни.