Луксузните хотели во Дубаи се обидуваат да ги надоместат загубите од намалениот број странски туристи преку специјални понуди за локалното население и жителите на Обединетите Арапски Емирати.
По падот на туристичките пристигнувања предизвикан од воениот конфликт на Блискиот Исток, хотелите во еден од најпознатите светски туристички центри почнаа да нудат значителни попусти, со што луксузот што некогаш беше резервиран за богатите посетители стана подостапен и за локалните жители.
На вештачкиот остров Палма Џумеира, симбол на луксузот во Дубаи, хотелите повторно бележат зголемен број гости за време на викендите благодарение на жителите на Емиратите и бројните странци кои живеат во земјата.
Либанскиот лекар Фади Искандарани, кој веќе пет години живее во Дубаи, изјави дека првпат можел да си дозволи престој на Палма Џумеира поради специјалните цени за резиденти.
„Луксузот во Дубаи стана достапен“, изјавил тој, додавајќи дека цената била четири пати пониска од вообичаената.
Дубаи во 2025 година пречекал 19,5 милиони туристи и бил една од најпосетените дестинации во регионот. Неговите 827 хотели, од кои 173 се со пет ѕвезди, тогаш бележеле просечна пополнетост над 80 проценти.
Сепак, конфликтот меѓу Израел, САД и Иран сериозно влијаел врз перцепцијата за безбедноста во регионот и довел до значително намалување на бројот на странски посетители.
Мајкл Робинсон, директор на луксузниот хотел „Анантара Палм“, изјави дека хотелот за време на викендите достигнува повеќе од 90 проценти пополнетост благодарение на локалните гости, но во текот на работната недела бројките паѓаат на само 20 до 30 проценти.
Иако новата клиентела им помага на хотелите да останат профитабилни, престојот на локалните гости е значително пократок од оној на странските туристи.
„Локалните посетители остануваат една или две ноќи, додека меѓународните туристи престојуваат по една или две недели“, објасни Робинсон.
Дел од хотелите ја искористиле намалената посетеност за реновирање, додека други биле принудени да го намалат бројот на вработени или платите. Според вработени во хотелскиот сектор, во некои случаи платите биле намалени и до 40 проценти.
И покрај тешкотиите, хотелските менаџери остануваат оптимисти и веруваат дека туристите брзо ќе се вратат доколку дојде до стабилизација на состојбата во регионот.
