Од Демократската унија за интеграција (ДУИ) реагираат на изјавите на српскиот претседател Александар Вучиќ во врска со првостепената пресуда на Специјализираните совети на Косово во Хаг против поранешните водачи на ОВК. Од партијата оценуваат дека влијанието на Белград и на концептот на таканаречениот „српски свет“ во Македонија денес е поголемо од кога било досега.
Од ДУИ тврдат дека, според нив, не станува збор само за политичка перцепција, туку за прашање кое е нотирано и во извештаи и проценки на меѓународни институции.
Реакцијата следува по обраќањето на Вучиќ за пресудата во Хаг. Од ДУИ оценуваат дека неговата изјава има цел да го пренасочи вниманието од суштинските прашања.
Партијата реагира и на споредбите меѓу Меѓународниот кривичен трибунал за поранешна Југославија и Специјализираните совети на Косово, нагласувајќи дека станува збор за институции со различен правен и институционален статус.
„Овој обид за манипулирање и дефокусирање на јавноста е сличен и на обидите на македонските политички партии во текот на вчерашниот ден да го изедначат Меѓународниот кривичен трибунал за поранешна Југославија, основан од Советот за безбедност на ОН во 1993 година, со Специјализираните совети на Косово“, велат од ДУИ.
Од партијата посочуваат дека Хашкиот трибунал за поранешна Југославија бил основан во 1993 година со резолуција на Советот за безбедност на Обединетите нации, додека Специјализираните совети на Косово се формирани врз основа на косовското законодавство и уставните измени, со седиште во Хаг.
Од ДУИ додаваат дека нема да дозволат, како што наведуваат, „наративите увезени од Белград“ да ја диктираат политичката дебата во земјата или да влијаат врз меѓуетничките односи, стабилноста и европската ориентација на државата.
Вучиќ во своето обраќање за пресудата во Хаг изјави дека таа не ги опфаќа злосторствата против човештвото и други злосторства извршени врз Срби. Тој дел од реакциите од меѓународната заедница и регионот ги оцени како лицемерни и тврдеше дека со години постои ист наратив насочен против Србите.
Српскиот претседател исто така изјави дека механизмот пред кој се води постапката против поранешните водачи на ОВК бил создаден пред 11 години под притисок на меѓународната заедница, со цел да се избегне формирање ад хок трибунал.
