Двајца морнари се водат како исчезнати, а 23 се спасени по нападот врз нафтен танкер во Ормускиот Теснец, соопштија оманските власти.
Танкерот „Ел Гаја“, кој плови под знамето на Панама, беше нападнат во вторникот, а сега се влече кон едно од пристаништата во Оман.
По нападот на бродот избувнал пожар во машинскиот простор, соопшти Оманскиот центар за поморска безбедност. Инцидентот се случил на околу 2,4 километри северно од полуостровот Мусандам.
За причината за нападот постојат спротивставени тврдења. Иранската револуционерна гарда соопшти дека танкерот налетал на морски мини и се запалил додека пловел по, како што тврди, ограничена и небезбедна маршрута. Американската војска ги отфрли овие тврдења како лажни.
Според американските информации, танкерот минатиот месец бил погоден со иранска ракета, а во текот на изминатиот викенд бил нападнат и со дрон. Британскиот центар за поморски трговски операции (UKMTO) исто така соопшти дека добил пријава за пожар на брод кој бил погоден со непознато оружје додека минувал низ теснецот во раните утрински часови во неделата.
Сличен инцидент се случи и на почетокот на месецов, кога на саудискиот супертанкер „Сидр“ загинаа двајца филипински морнари. И тогаш Иранската револуционерна гарда тврдеше дека бродот се запалил откако налетал на морска мина.
Саудиските власти, пак, соопштија дека бродот бил цел на ирански напад, додека компании за поморска безбедност известија дека бил погоден со ракети.
Според податоците на Меѓународната поморска организација, од крајот на февруари, кога започна војната меѓу САД, Израел и Иран, во 79 потврдени инциденти во Ормускиот Теснец и поширокиот регион на Блискиот Исток загинале најмалку 22 морнари.
Ормускиот Теснец, низ кој вообичаено минува околу една петтина од светските количества нафта и гас, практично е затворен поради нападите врз трговските бродови и американската поморска блокада на иранските пристаништа.
САД и Иран во јуни постигнале прелиминарен договор за завршување на војната и повторно отворање на теснецот, но договорот пропаднал по само неколку недели по новите напади, по што Вашингтон повторно ја вовел блокадата.
Иран инсистира на задржување одредено ниво контрола врз овој важен поморски пат и ги напаѓа бродовите кои ја користат јужната маршрута низ оманските води за да го избегнат минувањето низ иранската територија.
