Две лица тешко повредени на протестите во Франција, едното со сериозна повреда на раката

Две лица се тешко повредени за време на протестите во Франција, едното во Клермон-Феран, а другото во Тулуз, потврди францускиот министер за внатрешни работи Лоран Нуњез.

Еден од повредените се здобил со повреда на раката во саботата, на периферијата на протестот во Клермон-Феран. Префектурата на департманот Пуи-де-Дом соопшти дека, и покрај сериозноста на повредата, не дошло до ампутација или губење прст.

— реклама —

На повреденото лице прва помош му укажале пожарникарите на местото на настанот, а била потребна и итна интервенција на спасувачките служби.

— реклама —

Од префектурата нагласуваат дека засега е прерано да се утврдат околностите под кои настанала повредата. Обвинителството во Клермон-Феран потврди дека случајот барал итна медицинска интервенција, но не соопшти дополнителни информации за причините и точната тежина на повредата.

Според извор запознаен со случајот, повредата не била предизвикана од полициска граната, но оваа информација засега не е официјално потврдена од истражните органи.

— реклама —

Префектурата информираше и за други повредени лица, меѓу кои двајца со полесни повреди и еден припадник на интервентната полиција.

Министерот Нуњез потврди дека второто тешко повредено лице е регистрирано во Тулуз, но засега не се објавени дополнителни детали за неговата состојба и околностите на повредувањето.

Надлежните институции продолжуваат да ги утврдуваат околностите на инцидентите што се случиле за време на протестите.