ДЗС бара поранешни полицајци, војници и пожарникари за гаснење пожари, нуди 2.150 евра за три месеци

Дирекцијата за заштита и спасување (ДЗС) објави јавен повик за ангажирање поранешни припадници на полицијата, Армијата и противпожарните единици за справување со шумски и пожари на отворен простор во текот на летната сезона.

Потребни се возачи на специјални противпожарни возила, оператори на противпожарни пумпи вградени во возилата, како и оператори со противпожарни водни ранци и метли.

— реклама —

Од ДЗС информираат дека ангажираните лица ќе добиваат 44.000 денари нето месечно, односно вкупно 132.000 денари за три месеци, што изнесува околу 2.150 евра. За пензионерите, ангажманот нема да влијае врз исплатата на пензијата.

— реклама —

„Дојдете, помогнете и заработете 2.150 евра за три месеци во текот на летото, гаснејќи ги пожарите на отворен простор кои претстојат пред нас“, наведуваат од Дирекцијата.

Кандидатите треба да имаат најмалку пет години искуство во полицијата, Армијата или противпожарните единици, без разлика дали се пензионирани или од други причини повеќе не се дел од тие служби. Дополнително, потребно е да бидат во добра здравствена и психофизичка состојба.

— реклама —

Од ДЗС најавуваат дека ќе организираат здравствени прегледи, проверка на психофизичката подготвеност, кратка противпожарна обука, како и обезбедување униформи и неопходна опрема.

Работното време ќе биде прилагодено на состојбата на теренот и на потребите за интервенции, а користењето на слободните денови ќе се договара во зависност од обемот на ангажманите.

Заинтересираните кандидати можат да се пријават на електронската адреса dzs@dzs.gov.mk, при што треба да достават име и презиме, кратка работна биографија и телефонски број за контакт.