Епидемијата на ебола во Демократска Република Конго продолжува да се шири, а бројот на потврдени случаи веќе надмина 5.000. Здравствените власти предупредуваат дека досегашните напори за ставање на болеста под контрола не даваат доволни резултати.
Според најновите податоци на Институтот за јавно здравје, досега се регистрирани 5.021 потврден случај на ебола, додека бројот на починати достигна 2.378.
Станува збор за 17. епидемија на ебола во земјата, која кон крајот на јули стана најголема во историјата на Конго според бројот на заразени. Таа сега е втора најголема епидемија на ебола во светот, веднаш зад епидемијата во Западна Африка во периодот од 2014 до 2016 година, и според бројот на случаи и според бројот на починати.
Сегашната епидемија е предизвикана од сојот Бундибуџо, за кој во моментов нема одобрена вакцина или специфичен третман.
Болеста почна забрзано да се шири откако е прогласена епидемијата на 15 мај. Здравствените власти се соочуваат со сериозни пречки, меѓу кои слабата здравствена инфраструктура, нестабилноста во земјата, отпорот на дел од локалното население и протестите на здравствените работници ангажирани во борбата против еболата.
Сите овие фактори дополнително го отежнуваат откривањето на новите случаи, следењето на контактите и спречувањето на понатамошното ширење на смртоносната болест.
