ЕЦБ ѝ одобри траен пристап на Народната банка до ЕУРЕП – зголемена репо-линија во максимален износ од 50 милијарди евра

Народната банка ќе добие траен пристап до зголемената репо-линија на Евросистемот – ЕУРЕП, откако Европската централна банка ја одобри оваа можност со максимален износ од 50 милијарди евра.

— реклама —

По завршувањето на техничкиот процес за приклучување, Народната банка ќе има брз пристап до девизна ликвидност, што треба да овозможи полесно справување со потенцијални финансиски шокови и зголемена побарувачка за ликвидност во евра.

Иако девизните резерви на Народната банка се на високо ниво и претставуваат основен механизам за одржување на макроекономската и финансиската стабилност, пристапот до ЕУРЕП дополнително ќе ја зајакне отпорноста на финансискиот систем и заштитата од евентуални надворешни шокови.

— реклама —

Досега Народната банка имаше пристап до репо-линија на ЕЦБ во максимален износ од 400 милиони евра. Таа беше воспоставена за време на пандемијата на ковид-19, а последен пат беше продолжена до 31 јануари 2027 година.

— реклама —

За разлика од досегашната линија, ЕУРЕП е траен инструмент на Евросистемот, со значително поголем капацитет и поширок опфат, наменет за обезбедување ликвидност во евра во услови на евентуални пазарни нарушувања.

Зголемената репо-линија е инструмент на Евросистемот, воспоставен за поддршка на непреченото спроведување на монетарната политика. Таа обезбедува постојан пристап до ликвидност во евра за централните банки и монетарните власти надвор од еврозоната, а со неа управуваат пет национални централни банки под координација на ЕЦБ.

Одобрувањето на пристапот до ЕУРЕП, како што се наведува, ја потврдува определбата на ЕЦБ за обезбедување ликвидност во евра во периоди на пазарни предизвици и за поддршка на непреченото функционирање на финансиските пазари.