Една година СЕПА: Граѓаните и компаниите заштедиле над 5 милиони евра

За само една година од оперативното приклучување кон Единствената област за плаќање во евра – СЕПА, преку системот се реализирани повеќе од 581 илјада трансакции со вкупна вредност од околу 11 милијарди евра, соопшти Народната банка. Проценките покажуваат дека интеграцијата досега донела над 5 милиони евра заштеда за граѓаните и компаниите.

На 7 октомври се одбележува една година од приклучувањето на Македонија кон СЕПА, што од Народната банка го оценуваат како значаен чекор во модернизацијата на домашниот платен систем и неговото приближување кон европските стандарди.

— реклама —

Надоместоците за прекуграничните плаќања преку СЕПА се намалени до шестпати за граѓаните и до деветпати за компаниите во споредба со претходниот модел на кореспондентно банкарство. Од Народната банка очекуваат заштедите дополнително да растат со зголемувањето на користењето на СЕПА.

— реклама —

За помалку од една година, СЕПА стана водечки канал за прекугранични плаќања во евра и е достапна преку сите домашни банки. Во септември 2026 година, трансакциите преку СЕПА учествувале со 69 отсто во вкупниот број прекугранични трансакции во евра.

Кај одливите, учеството достигнало 67 отсто, а кај приливите 70 отсто. Во однос на вредноста на трансакциите, преку СЕПА биле обработени повеќе од половина од средствата што влегуваат преку прекугранични трансакции во евра, додека кај одливите учеството надминало 70 отсто.

— реклама —

Податоците покажуваат и зголемена употреба на електронските канали. Кај физичките лица, преку СЕПА биле реализирани 70 отсто од електронските трансакции за прилив и 80 отсто од електронските трансакции за одлив. Кај компаниите, учеството изнесувало 70 отсто кај електронските приливи и 65 отсто кај електронските одливи.

Според Народната банка, СЕПА освен што ги поедноставува и поевтинува прекуграничните плаќања, отвора и можности за поголема дигитализација, иновации, конкурентност и финансиска вклученост.

Од Народната банка најавуваат дека и натаму ќе работат на модернизација на домашниот финансиски систем и на унапредување на платежната инфраструктура, со цел граѓаните и компаниите да имаат современи, брзи и достапни начини за плаќање.