Фотографирањето и снимањето за време на летот станаа речиси неизбежен дел од патувањата, но авиокомпаниите сè почесто предупредуваат дека постојат јасни граници што патниците мора да ги почитуваат.
Погледот низ прозорецот, оброкот во авионот или видеото од полетувањето редовно завршуваат на социјалните мрежи, но проблемите настануваат кога во кадар се појавуваат други патници или членови на екипажот без нивна согласност.
Сè поголем број авиокомпании истакнуваат дека фотографирањето и снимањето стјуардеси, стјуарди и други патници без дозвола не е прифатливо. Особено спорно е објавувањето на такви содржини на интернет или емитувањето во живо од кабината на авионот.
Доколку некој патник го попречува работењето на екипажот или ја нарушува приватноста на останатите, авиокомпанијата може да изрече предупредување, да пријави инцидент или, во одредени случаи, да преземе и построги мерки.
Од друга страна, фотографирањето на погледот низ прозорецот, сопственото седиште, храната или личните моменти од патувањето останува дозволено, сè додека не се нарушува приватноста на другите патници.
Слични правила применуваат и голем број светски авиокомпании, кои нагласуваат дека правото на приватност мора да се почитува во текот на целиот лет. Доколку снимањето предизвикува непријатност кај патниците или го попречува персоналот, екипажот има право да побара негов прекин.
Експертите предупредуваат дека особено чувствително е снимањето расправии, конфликти или други непријатни ситуации во авионот. Иако ваквите видеа често стануваат вирални на интернет, лицата што ги снимаат можат да се соочат со последици доколку одбијат да ги почитуваат инструкциите на екипажот.
Затоа, советот е за време на летот да се снима само содржина што не ја нарушува приватноста на другите лица и не го попречува работењето на авиоперсоналот, а за секое снимање што вклучува други лица претходно да се побара нивна согласност.
