Едно лице загина, петмина повредени во вооружен напад во близина на Париз

Осомничениот за смртоносниот вооружен напад во близина на Париз, Франција, бил под дејство на дрога, а на истражителите наводно им кажал дека се лекува од шизофренија. Нападот, кој францускиот претседател Емануел Макрон го окарактеризира како расистички терористички чин, се случил во петокот во местата Трап и Ла Верјер.

— реклама —

Едно лице загинало, а петмина биле повредени, од кои некои тешко, меѓу нив и 12-годишно девојче. Според информациите, 39-годишниот осомничен пукал со автоматско оружје од автомобил.

Осомничениот бил уапсен набргу по нападот. Париското обвинителство задолжено за борба против тероризмот во неделата соопштило дека во неговата крв биле откриени траги од канабис и кокаин.

— реклама —

По првичната психијатриска процена, мажот бил префрлен од полициски притвор на психијатриско одделение при полициската управа во Париз. Лекарите треба да проценат дали неговата здравствена состојба дозволува истражителите да продолжат со испрашувањето.

— реклама —

Телевизијата ТФ1-ЛЦИ и весникот „Ле Паризиен“, повикувајќи се на истражни извори, објавиле дека осомничениот им кажал на полицајците дека се лекува од шизофренија.

Францускиот претседател Емануел Макрон го осуди нападот, нарекувајќи го „расистички терористички напад“. Градоначалникот на Трап изјавил дека можно е нападот да бил насочен кон мигранти, односно лица со африканско и северноафриканско потекло, како и кон муслимани.

Роднините и пријателите на осомничениот, кои биле уапсени по нападот, и натаму се задржани во полициски притвор, соопштило обвинителството.