Директорите на училиштата во Франција бараат заштита по серијата напади и насилни инциденти

Во Франција денеска е најавен нов „ден на мобилизација“ во средните училишта, откако директорите на образовните установи повикаа на собири низ земјата поради сè почестите случаи на насилство, напади врз вработените и уништување на училишниот имот.

— реклама —

Синдикатот на директорите на средните училишта СНПДЕН-УНСА ги повика раководителите на образовните установи во 15 часот да се соберат пред училиштата и да побараат конкретна поддршка од институциите за заштита на вработените. Во Париз, собирот е најавен пред Колеж де Франс.

Директорите сакаат да им дадат поддршка на колегите кои во изминатите недели биле изложени на напади, но и да побараат итни мерки за справување со кризата, за која сметаат дека училиштата не можат самостојно да ја надминат.

— реклама —

Повикот за мобилизација следува откако францускиот премиер Себастијан Лекорни обвини дел од вработените во образовниот систем дека се „соучесници“ во насилството забележано во некои средни училишта во изминатите денови. Тој посочи дека одредени млади луѓе добиваат поддршка од вработени во јавните служби за време на насилните инциденти и блокадите на училиштата, но нагласи дека станува збор за малцинство.

— реклама —

Лекорни порача дека сите што учествуваат во ваквите активности мора да сносат одговорност, без оглед дали се вработени во образованието. Според него, против одговорните треба да бидат поведени постапки пред надлежните судски органи или да им бидат изречени дисциплински мерки.

Француската влада го обвини и левичарското движење „Непокорна Франција“ за соучесништво во одредени случаи на насилство и блокади на средни училишта. „Не треба да бидеме наивни кога станува збор за улогата на одредени политички актери во протестите“, изјави Лекорни.

— реклама —

Во меѓувреме, претставници на синдикатите на вработените во јавниот сектор денеска во 9:30 часот треба да се сретнат со претставници на француската влада во палатата Матинјон. На средбата ќе се разговара за платите и куповната моќ на вработените.