Објавени нови детали за хакерските напади врз фрижидерите во продавниците: „Лозинката била 12345“

Истражувачи за кибербезбедност откриле засилени обиди за упад во системи за ладење поврзани на интернет, неколку дена пред нападите врз супермаркети во девет европски држави и неколку крвни банки во Франција.

Нападите се случиле на почетокот на ноември, а во дел од продавниците температурата во ладилниците и замрзнувачите се искачила до 50 степени Целзиусови. Поради расипувањето на храната, трговските објекти морале да ги фрлат залихите. Во крвните банки во Франција не била изгубена крв, а засега не е познато кој стои зад нападите.

— реклама —

Компанијата за кибербезбедност „Луповис“ меѓу 20 и 30 октомври регистрирала повеќе од 276 обиди за пристап до компоненти на контролерите за ладење на „Данфос“. Активноста потекнувала од 91 различен потенцијален напаѓач, а најголем број обиди биле забележани на 26 октомври.

— реклама —

Според извршниот директор на компанијата, Ксавиер Белкенс, напаѓачите се обидувале да користат фабрички лозинки и да искористат познати безбедносни пропусти. Обидите биле откриени преку таканаречени „медени замки“ – лажни системи што истражувачите намерно ги изложуваат на интернет за да ги следат хакерските активности.

„Луповис“ открила и дигитални траги што упатуваат на можноста за руска поврзаност. Компанијата забележала користење услуги за хостирање што го отежнуваат исклучувањето на серверите и соработката со полицијата, а кои претходно ги користеле и руски хакерски групи. Сепак, од компанијата нагласуваат дека немаат докази со кои може да се потврди дека Русија стои зад нападите.

— реклама —

Експертите предупредуваат дека не треба да се изнесуваат конечни заклучоци за сторителите, особено затоа што немало барања за откуп ниту преземање одговорност. Нападите биле овозможени и поради тоа што контролните единици биле директно поврзани на интернет, а дел од нив наводно сè уште користеле фабрички податоци за најава и слаби лозинки.

Загриженоста не се однесува само на системите за ладење. Слични безбедносни пропусти може да постојат и кај системите за греење, вентилација и климатизација, електронските ознаки на полиците, камерите, алармите и роботите за чистење.

— реклама —

Експертите предупредуваат дека напад врз вакви системи во болници или центри за податоци би можел да ги оневозможи камерите или алармите, без веднаш да биде забележано дека нешто не функционира. Вештачката интелигенција би можела дополнително да го забрза откривањето слабости и развојот на идни напади, но нема индиции дека била користена во нападите врз европските системи за ладење.