Франција размислува за создавање стратешки резерви на жито поради глобалната нестабилност

Француската влада разгледува можност за формирање стратешки резерви на жито поради растечката меѓународна нестабилност и потребата од поголема сигурност во снабдувањето со храна. Министерката за земјоделство Ани Женвард побарала до крајот на месецот да ѝ бидат доставени конкретни предлози, објави радиото РТЛ.

Франција имала стратешки резерви на храна по Втората светска војна, но системот бил укинат во 1950-тите години. Сега властите повторно ја разгледуваат оваа можност.

— реклама —

Според РТЛ, во земјата има околу 4.500 силоси за жито, чии капацитети би биле доволни за покривање на основната потрошувачка во период од еден месец во случај на воен судир. Сепак, нивните сопственици немаат ограничувања за извоз на житото, објектите не се оградени ниту обезбедени, а нивните адреси се јавно достапни.

— реклама —

„Денес стратешки резерви се создаваат низ цела Европа, во секоја европска држава освен Франција. Тоа е чисто лудило“, изјави за РТЛ Ерик Тироен, претседател на здружението на производители на жито АГПБ. Тој оцени дека безбедноста на снабдувањето со храна е исклучително важна и дека резервите се неопходни.

Министерката Женвард им наложила на службите итно да формираат работна група. Француското Министерство за земјоделство, според агенцијата АФП, започнало и итна мисија за испитување на можностите за воспоставување вакви резерви, но засега не објавило дополнителни детали.

— реклама —

За разлика од житото, Франција располага со стратешки резерви на нафтени деривати. На почетокот на октомври од нив биле повлечени 10 милиони барели дизел со цел да се намалат цените на горивата.

— реклама —

Дополнителна загриженост предизвикува и намалувањето на површините под житни култури. Според податоците на АГПБ, кои ги пренесува АФП, тие во последните десет години се намалиле за 900.000 хектари – од 8,1 милиони хектари во 2016 година на 7,2 милиони оваа година.

Иницијативата доаѓа во период кога Европската комисија испратила официјално известување до земјите членки на ЕУ, повикувајќи ги да ја зајакнат домашната безбедност на снабдувањето со храна.