Франција се сомнева дека Иран стои зад кибер-нападите врз повеќе од 700 супермаркети

Француските власти се сомневаат дека Иран стои зад кибер нападите врз системите за ладење во супермаркетите во Франција, што се случија во октомври, соопшти францускиот министер за надворешни работи, Жан-Ноел Баро.

Јавното обвинителство во Париз веќе отвори истрага за случајот и издаде меѓународни налози за апсење на тројца припадници на кибер единица на Корпусот на Иранската револуционерна гарда.

— реклама —

Во текот на ноќта меѓу 11 и 12 октомври, системите за ладење во супермаркети на повеќе од 700 локации низ Франција беа цел на кибер напад. Како резултат на тоа, температурата во некои системи се искачи до 50 степени Целзиусови, што доведе до значителни загуби на храна и сериозни штети.

Според француското Министерство за надворешни работи, постои сомневање оти нападот бил извршен од страна на кибер офанзивната единица „Шахид Кавех“, која е поврзана со Центарот за електроника и кибер операции на Иранската револуционерна гарда.

Баро нагласи дека истрагата на Јавното обвинителство во Париз открила неколку траги кои укажуваат на иранската кибер единица. На пример, користен е метод што е „типичен за таа единица“, комуникацијата се одвивала на персиски јазик (фарси), а биле употребени Ај-Пи-адреси што може да се поврзат со уреди во Иран.

— реклама —

Според Франција, станува збор за напад од невидени размери.

„Ова е операција без преседан, како во однос на обемот, така и во однос на агресивноста. Се смета дека ова е првата офанзивна кибер кампања од големи размери на француска територија, која имала за цел исклучиво саботажа“, истакна Баро.

— реклама —

Франција, исто така, најавува мерки против Иран. Иранскиот амбасадор во Париз е повикан на разговор, а француската Влада бара воведување дополнителни европски санкции „против ирански поединци и организации за кои постои сомневање дека се вмешани во овој напад и во други злонамерни кибер активности“.

Во меѓувреме, Јавното обвинителство во Париз издаде и меѓународни налози за апсење на раководителот на кибер-единицата и двајца негови соработници.

Нападот во Франција беше првиот во низата слични инциденти во Европа. На 2 ноември, и системите за ладење во неколку други европски држави беа цел на кибер-напад. Сепак, сè уште не е јасно дали истата иранска хакерска група стои и зад овие напади.

— реклама —

Јавното обвинителство во Париз и Министерството за надворешни работи на Франција ја ограничуваат својата истрага само на нападите во Франција.

Како за нападите во Франција, така и во другите европски земји, хакерите ги искористиле ранливостите во системите на данската технолошка компанија „Данфос“ (Danfoss), која испорачува софтвер за далечинско управување со системи за ладење.