Странски мрежи ги искористиле немирите во Франција за ширење дезинформации, откриваат документи на ЕУ

Руски, израелски и американски мрежи поврзани со движењето МАГА се обиделе да ги искористат минатомесечните немири во Франција за ширење дезинформации и влијание врз јавното мислење, покажуваат интерни процени на Европската Унија и француското Министерство за надворешни работи до кои дошол „Ројтерс“.

— реклама —

Според документите, целта била да се промовираат наративи за неконтролирана миграција, радикален исламизам и неспособност на француските власти да одржат ред и стабилност.

Руската мрежа позната како „Операција преоптоварување“ ширела лажни видеоснимки претставени како прилози на западни медиуми. Во дел од објавите се тврдело дека мигранти силувале демонстранти или дека се подготвуваат терористички напади.

— реклама —

Сепак, во анализата на ЕУ се нагласува дека нема докази оти Русија или други странски актери ги предизвикале или дополнително ги поттикнале протестите, туку дека станува збор за искористување на веќе постојните немири.

— реклама —

Според процените на француското Министерство за надворешни работи, десетте најгледани објави поврзани со немирите од проруските кругови имале 2,8 милиони прегледи. Наспроти тоа, десет објави од профили поврзани со движењето МАГА достигнале повеќе од 49 милиони прегледи, додека објавите од израелски функционери, медиуми и влијателни личности имале над 35 милиони прегледи.

„Операцијата преоптоварување“ е активна од септември 2023 година и, според извештајот на ЕУ, е насочена кон нарушување на угледот на западни јавни личности, институции и медиуми, како и кон слабеење на европската поддршка за Украина.

— реклама —

Немирите во Франција избувнаа минатиот месец откако протестите поради растот на трошоците за живот и влошувањето на јавните услуги на одредени места прераснаа во насилни судири.