Романската влада договори доброволно намалување на потрошувачката на електрична енергија со најголемите индустриски потрошувачи, како дел од мерките за справување со енергетската криза предизвикана од екстремната суша и рекордно нискиот водостој на Дунав.
Вршителот на должноста премиер, Илие Боложан, соопшти дека компаниите ќе ја намалуваат потрошувачката во периодот од 19 до 23 часот, кога оптоварувањето на електроенергетскиот систем е најголемо. Истовремено, државните институции ќе го намалат осветлувањето на јавните објекти и, каде што е можно, интензитетот на уличното осветлување.
По средбата со претставници на околу 80 компании, чија годишна потрошувачка надминува 50.000 мегават-часови, Боложан изјави дека мерките ќе бидат приспособени на дејноста на секоја компанија. Дел од нив привремено ќе го запрат производството, додека други ќе продолжат со работа за да не се нарушат технолошките процеси.
Тој апелираше и до граѓаните, компаниите и јавните институции доброволно да ја намалат потрошувачката на електрична енергија, нагласувајќи дека можностите за увоз на струја се ограничени.
Според Боложан, автомобилските производители „Дачија“ и „Форд“ веќе го прекинале производството до 19 август, а сличен чекор се очекува да преземат и други компании.
Романската влада презеде и мерки за обезбедување доволен проток на Дунав кон нуклеарната централа „Чернавода“. Властите отстраниле природна пречка што го ограничувала протокот на вода, а во наредните денови ќе спроведат дополнителни активности за подобрување на дотокот.
Боложан предупреди дека енергетската криза не ја погодува само Романија. Поради намаленото производство во нуклеарните централи, енергетски дефицит има и во Унгарија, Србија, Бугарија, Романија и Молдавија, што дополнително ја усложнува состојбата во регионот.
