Турскиот претседател Реџеп Таип Ердоган изјави дека Турција очекува претстојниот самит на НАТО, кој ќе се одржи следниот месец во Анкара, да испрати силна порака за единство и солидарност меѓу земјите членки на Алијансата.
Ердоган истовремено повика на укинување на ограничувањата за трговија со оружје и воена опрема, како и на поголемо вклучување на Турција во иницијативите за зајакнување на европската безбедност, пренесува Ројтерс.
Анкара на 7 и 8 јули ќе биде домаќин на самитот на кој ќе учествуваат лидерите на 32 земји членки на НАТО, како и претставници на партнерските земји од Персискиот Залив, Азија и Пацификот.
Самитот ќе се одржи во услови на зголемени тензии во рамките на Алијансата поврзани со распределбата на трошоците за одбрана, како и со критиките од САД за недоволниот ангажман на дел од сојузниците во повторното отворање на Ормускиот теснец за време на неодамнешниот конфликт меѓу САД, Израел и Иран.
„Нашето главно очекување од самитот е да постигнеме резултати што ќе ги заштитат чувствителните безбедносни интереси на сојузниците и ќе го зајакнат духот на солидарност и единство во Алијансата“, изјави Ердоган на настан во Истанбул организиран за парламентарци од земјите членки на НАТО.
Турскиот претседател посочи дека на самитот ќе се разговара и за конфликтите во Иран, Украина и Појасот Газа. Тој додаде дека Анкара очекува поголема поддршка од сојузниците во борбата против милитантната Работничка партија на Курдистан (ПКК), како и вклучување на Турција во европските одбранбени планови.
