Ерменија сака во ЕУ до 2028 година, Русија се заканува со прекин на испораките на енергенси

Ерменија би можела да поднесе официјално барање за членство во Европската Унија во 2027 или 2028 година, изјави ерменскиот премиер Никол Пашинјан.

Тој истакна дека пристапувањето во ЕУ е стратешки избор на неговата земја, со цел зачувување на демократијата, а конечната одлука за идниот надворешнополитички правец ќе ја донесат граѓаните на Ерменија.

Пашинјан во интервју за „Еуроњуз“, на Самитот за проширување на ЕУ, оцени дека е реално да се очекува Ерменија уште следната година или во 2028 година да поднесе официјална кандидатура за членство во Унијата.

— реклама —

„Следната година е реална можност, а реална можност е и 2028 година. Го започнавме процесот што ќе нè доведе до конечна одлука за поднесување официјално барање за членство во Европската Унија“, рече ерменскиот премиер.

Пашинјан во август пред националниот парламент најави дека неговата влада има намера во блиска иднина да поднесе барање за членство во ЕУ.

Според Пашинјан, членството во Европската Унија претставува стратешки избор за заштита на демократијата во Ерменија.

— реклама —

„За нашиот народ, демократијата не е прашање на околности, туку стратешки избор. Европската Унија беше еден од главните партнери на Ерменија во спроведувањето на програмата за демократски реформи“, истакна Пашинјан.

Тој наведе дека една од основните цели на неговата влада е да им понуди на граѓаните алтернатива во однос на надворешнополитичката и економската определба на земјата.

— реклама —

„Нашата прва намера е да создадеме алтернатива за народот на Ерменија и за самата Ерменија, бидејќи во нашето општество, а можеби и во нашето опкружување, традиционално преовладуваше перцепцијата дека Ерменија нема алтернатива“, рече премиерот.

Русија се закани со можни контрамерки, меѓу кои најмногу се споменува прекинување на испораките на енергенси за Ерменија. Пашинјан изјави дека неговата влада настојува да ги диверзифицира политичките и економските односи на земјата.

„Доколку во кои било односи не постои рамнотежа, секогаш постои ризик“, оцени тој.

— реклама —

Коментирајќи ги предупредувањата на заменик-претседателот на Советот за безбедност на Русија, Дмитриј Медведев, дека Ерменија би можела да стане „нова Украина“, Пашинјан ги отфрли таквите споредби, нагласувајќи дека приоритет на неговата влада е зачувувањето на независноста на земјата.

„Нашата цел е да ја унапредиме и развиваме нашата независност. Тоа е легитимна цел. Никој не може да ја ограничи тежнеењето на Ерменија да стане понезависна и поинтегрирана земја“, порача Пашинјан.

Ерменскиот премиер рече дека неговата влада е свесна оти приближувањето кон Европската Унија би значело и соочување со изборот меѓу членството во ЕУ и останувањето во Евроазиската економска унија, предводена од Русија. Сепак, нагласи дека одлуката треба да ја донесат граѓаните на Ерменија.