(Видео) Тепачка во ерменскиот парламент, пратениците се удираа со тупаници и фрлаа столчиња

Во парламентот на Ерменија избувна масовна тепачка меѓу пратениците од владејачката партија „Граѓански договор“ на премиерот Никол Пашинјан и опозициската партија „Силна Ерменија“. Пратениците се удирале со тупаници и клоци, фрлале столчиња и превртувале маси, по што морало да интервенира собраниското обезбедување.

Инцидентот се случил за време на расправата за именување на член на Ревизорската комора, тело што го надгледува трошењето на јавните средства. Според ерменските медиуми, расправијата започнала откако пратеникот од владејачката партија Тарон Чахојан зборувал за политичкиот ангажман на членовите на семејството на опозицискиот лидер Нарек Карапетјан.

— реклама —

По меѓусебните навреди, пратениците станале од своите места и физички се пресметале. На снимките се гледа како си разменуваат удари, се туркаат и се обидуваат да ги раздвојат своите колеги. Потпретседателот на парламентот, Вахагн Александјан, во еден момент фрлил столче кон опозициските пратеници.

— реклама —

По тепачката, на опозицискиот пратеник Андраник Геворгјан му течела крв од носот, додека на неговиот колега Рубен Мхитарјан му била искината облеката. Била повикана и итна медицинска помош, но од службата подоцна соопштиле дека не била укажана медицинска помош.

— реклама —

Претседавачот со седницата, Рубен Рубињан, првично одбил да ја прекине расправата, велејќи дека сака јавноста да види како се однесуваат пратениците. Сепак, по продолжувањето на судирите, седницата била прекината, а обезбедувањето интервенирало. Расправијата продолжила и во собраниските ходници.

Ерменскиот премиер Никол Пашинјан го осудил насилството, но одговорноста за инцидентот ја префрлил врз опозицијата и ги поддржал постапките на пратениците од својата партија. Тој оценил дека фрлањето столче кон опозициските пратеници било соодветна и оправдана реакција.

Ова е втор физички судир меѓу пратениците од власта и опозицијата во ерменскиот парламент во текот на октомври. Сличен инцидент се случил и на 6 октомври, кога исто така интервенирало обезбедувањето.