ЕРМЕНИЈА

Путин до Ерменија: Не тргнувајте по украинскиот пат

Рускиот претседател Владимир Путин и ерменскиот премиер Никол Пашињан денеска телефонски разговарале во услови на зголемени тензии меѓу Москва и Ереван, додека Ерменија се подготвува за парламентарните избори закажани за 7 јуни.Според германската агенција ДПА, двајцата лидери се договориле наскоро да одржат средба во живо со цел да ги надминат постојните несогласувања во билатералните односи.Главна точка на спор е стремежот на Ерменија кон поблиска интеграција со Европска Унија. Пашињан, кој според анкетите важи за фаворит на претстојните избори, го отфрла барањето на Москва за распишување референдум на кој граѓаните би требало да изберат меѓу членство во ЕУ и останување во Евроазиска економска унија.Пашињан на социјалните мрежи порача дека евентуалното членство во ЕУ засега е теоретска можност и дека Ерменија ќе остане дел од Евроазиската економска унија.Путин неодамна предупреди дека Ерменија „не може да седи на две столици“ и дека ќе мора да избере меѓу Истокот и Западот. На неодамнешен состанок во Астана тој ја повика Ерменија да не тргнува по „украинскиот пат“.И покрај традиционално блиските врски со Русија, односите меѓу двете земји се влошија во последните години. Ереван сè поинтензивно ги развива односите со Брисел и Вашингтон, а незадоволството дополнително порасна поради тоа што Москва не ѝ помогна на Ерменија во конфликтот со Азербејџан.Минатата недела американскиот државен секретар Марко Рубио го посети Ереван, каде што беше потпишан договор за стратешко партнерство меѓу двете земји. Во меѓувреме, ерменскиот парламент усвои закон со кој формално започнува процесот за пристапување на земјата кон Европската Унија.Ерменија, која има околу три милиони жители, и натаму е силно зависна од руските енергенси и на нејзина територија се наоѓаат руски воени бази. Според податоците на Интерфакс, минатата година земјата увезла 2,7 милијарди кубни метри природен гас, од кои 82 проценти биле од Русија.

Свет | пред 4 дена

Кремљ: Ерменија ризикува да изгуби многу атрактивна цена за рускиот гас

Кремљ предупреди дека Ерменија би можела да ја изгуби „многу атрактивната“ цена што ја плаќа за рускиот гас доколку се оддалечи од интеграцијата со Русија и се приближи кон Европската Унија.Портпаролот на Кремљ, Дмитриј Песков, изјави дека Ерменија во моментов добива гас по „повластени услови“, но таквите цени не важат за земји што се дел од други интеграциски рамки.„Постои многу, многу атрактивна и повеќе од повластена цена за рускиот гас. Но, секако, тие услови не се достапни за учесници во други интеграциски рамки“, рече Песков.Ерменија е членка на Евроазиската економска унија, предводена од Русија, и во голема мера зависи од руската енергија, но во последните години настојува да ги продлабочи врските со Европската Унија. Минатата година земјата усвои закон за почеток на процесот за пристапување кон ЕУ.Ерменскиот министер за надворешни работи, Арарат Мирзојан, изјави дека Ереван нема намера да ги прекине политичките и економските врски со Москва.„Сакаме и ќе се стремиме да ги зачуваме и да ги продлабочиме нашите вообичаени односи“, изјави Мирзојан.Односите меѓу Русија и Ерменија се влошија по настаните во Нагорно-Карабах во 2023 година, кога Азербејџан повторно ја презеде контролата врз регионот и покрај присуството на руски мировни сили.Рускиот претседател Владимир Путин во април изјави дека Ерменија плаќа 177,5 долари за 1.000 кубни метри руски гас, додека цената во Европа е над 600 долари.

Свет | пред 1 седмица

Трамп најави „историски“ мировен договор меѓу Ерменија и Азербејџан

Американскиот претседател Доналд Трамп објави дека денеска во Белата куќа ќе ги пречека премиерот на Ерменија Никол Пашинјан и претседателот на Азербејџан Илхам Алиев на официјална церемонија за потпишување мировен договор, со цел ставање крај на децениското непријателство меѓу двете поранешни советски републики.„Овие две нации со години беа во војна, што резултираше со илјадници жртви. Многу лидери се обидоа да го запрат конфликтот, но без успех – сè до сега, благодарение на Трамп“, напиша тој на својата мрежа Truth Social, додавајќи дека е „многу горд на храбрите лидери“ кои се одлучиле за мир.Ерменија и Азербејџан водеа два крвави конфликта околу Нагорно-Карабах. Во 2023 година, Азербејџан ја врати областа под своја целосна контрола во кратка, но жестока офанзива, што предизвика егзодус на над 100.000 етнички Ерменци. И покрај мировните преговори – вклучувајќи ги и минатомесечните во ОАЕ – досега немаше значаен напредок.Покрај мировниот договор, Вашингтон ќе потпише и билатерални спогодби со двете држави за економска соработка, со фокус на развој на транзитен коридор наречен „Трамповата рута за меѓународен мир и просперитет“. Коридорот треба да го поврзе Азербејџан со неговата ексклава Нахчиван преку 32 километри ерменска територија, и со време да вклучува железница, нафтоводи, гасоводи и оптички кабли.Договорот доаѓа по посетата на специјалниот пратеник на Трамп, Стив Виткоф, на Баку годинава. Според американски извори, проектот ќе го развиваат приватни компании, без директно финансирање од САД.Ако се реализира, договорот би можел да ја затвори страницата на еден од најдолготрајните и најжестоки конфликти на постсоветскиот простор и да отвори ново поглавје за Јужниот Кавказ.

Свет | пред 9 месеци

Хеликоптерот со ерменскиот премиер мораше принудно да слета

Ерменскиот премиер Никол Пашинјан денеска соопшти дека хеликоптерот што го превезувал принудно слетал поради лошите временски услови и за среќа инцидентот не предизвикал жртви.„Се е во ред. Поради лошите временски услови, нашиот хеликоптер непланирано слета во Ванадзор. Сега го продолжуваме патувањето со автомобил“, објави ерменскиот премиер на Фејсбук.Ванадзор, на северот од оваа кавкаска земја, се наоѓа во долина опкружена со планини.Пашинјан моментално се соочува со предизвик дома поради неодамнешното отстапување на четири погранични села на Азербејџан, како и победата на Баку во последните две војни за контрола на енклавата Нагорно-Карабах, во 2020 и 2023 година.Во мај, хеликоптерска несреќа во планинските области и тешките временски услови го однесоа животот на иранскиот претседател Ебрахим Раиси, кој леташе над северозападниот дел на Иран.

Свет | пред 2 години

Ерменија: Немаме намера да влеземе во НАТО

Ерменскиот министер за надворешни работи Арарат Мирзојан денеска изјави дека Ерменија нема намера да влезе во НАТО.„Ова прашање не е на агендата на Еремнија“, рече Мирзојан во интервју за ТВ каналот ТН, пренесува Интерфакс. Тој додаде дека Ерменија ги смета САД и Европа за нејзини главни партнери.„Имаме демократија и сакаме да ги зајакнеме демократските институции. САД и Европската унија се нашите главни партнери“, рече ерменскиот министер.Тој посочи дека официјален Ереван ги продлабочува економските и политичките односи со Брисел и Вашингтон, додавајќи дека не станува збор за надворешнополитички пресврт.„Ние само се обидуваме да ја обезбедиме нашата безбедност и развој на демократскиот пат“, рече Мирзојан.Тој изјави дека има проблеми во односите меѓу Ерменија и Русија.„Имаме економски односи со Русија, билатерална трговија, соработуваме на различни полиња и одржуваме добри врски на полето на безбедноста. Сепак, точно е дека денес имаме различни ставови и дека, едноставно кажано, не зборуваме ист јазик. Проблемите што постојат во односите со Русија не можат да ги сокријат“, рече шефот на ерменската дипломатија.

Свет | пред 2 години