Новата ерупција на вулканот Етна предизвика сериозни нарушувања во воздушниот сообраќај на Сицилија, а најпогоден е аеродромот во Катанија.
Во периодот од 8 до 11 август биле откажани околу 700 летови, додека, според податоците на управата на аеродромот, денес се очекува откажување на уште 52 лета. Повеќе од 250 авиони биле пренасочени кон други аеродроми на Сицилија.
Од почетокот на нарушувањата, повеќе од 100 летови слетале во Комизо, додека само вчера околу 50 авиони биле пренасочени кон Палермо, а 22 кон аеродромот во Трапани.
Компанијата САК, која управува со аеродромот во Катанија, потврди дека операциите се прекинати поради ширењето на вулкански пепел во атмосферата. Сите полетувања и слетувања во Катанија се прекинати до утре во 16 часот.
Од управата на аеродромот ги повикаа патниците да не доаѓаат без претходно да го проверат статусот на својот лет кај авиокомпанијата.
Вулканот Етна од петокот исфрла големи количества пепел и жешки карпи. Според Италијанскиот национален институт за геофизика и вулканологија, густи текови на лава излегуваат од два отвора на височина од 2.360 и 2.750 метри.
Во текот на ноќта се отворил и нов отвор на височина од околу 1.900 метри. Етна, најактивниот вулкан во Европа, е висок повеќе од 3.300 метри и внимателно се следи поради честите ерупции.
