Етна повторно активна: Вулканскиот пепел го наруши воздушниот сообраќај на Сицилија

Етна повторно еруптира, а вулканскиот пепел веќе предизвикува сериозни проблеми во воздушниот сообраќај на Сицилија. Облакот од пепел достигнал височина од околу четири километри и се движи кон југ, во правец на Катанија и нејзиниот аеродром „Фонтанароса“.

— реклама —

Поради опасноста за авионите, пристигнувањата и полетувањата од аеродромот во Катанија се прекинати до 10 часот на 15 септември. Компанијата SAC, која управува со аеродромите во Катанија и Комизо, соопшти дека поради исфрлањето пепел од Етна и правецот на ветровите на поголема височина, продолжено е затворањето на воздушниот простор во секторите C1 и B3.

Станува збор за делови од воздушниот простор каде што вулканскиот пепел може да претставува опасност за авионите. Движењето на облакот се следи врз основа на пресметките на Националниот институт за геофизика и вулканологија (INGV), кои се објавуваат преку билтените VONA – известувања на вулканолошката опсерваторија за воздухопловството.

— реклама —

Проблемите на аеродромот во Катанија траат речиси 24 часа. Првиот прекин на летовите беше воведен во 9:30 часот, со најава дека ќе трае до 16 часот. Подоцна беше продолжен до 22 часот, а со најновата одлука прекинот е продолжен до 10 часот на 15 септември.

— реклама —

Во текот на денот без ограничувања биле реализирани само 16 летови, додека повеќе од 150 летови биле откажани, одложени или пренасочени кон други аеродроми. Бројот на погодени летови и натаму се ажурира.

SAC ги повика патниците, пред да тргнат кон аеродромот, директно кај авиокомпанијата да го проверат статусот на својот лет, бидејќи состојбата зависи од активноста на вулканот и движењето на пепелта.

Етна, еден од најактивните вулкани во Европа, и во изминатите месеци неколкупати предизвика нарушувања во воздушниот сообраќај на источниот дел од Сицилија.