Ескалација на воздушните напади: Тројца загинати во Киев, Москва тврди дека соборила 201 украински дрон

Руските и украинските сили во текот на ноќта извршија нова серија масовни воздушни напади, при што има жртви и повредени во Киев, додека Москва тврди дека кон рускиот главен град биле насочени стотици украински беспилотни летала.

Градоначалникот на Киев, Виталиј Кличко, соопшти дека руските сили извршиле ракетен напад врз украинскиот главен град, при што избувнале пожари во најмалку два квартови. Според досегашните информации, загинале најмалку три лица, а повеќе од 10 се повредени. Воздушната тревога во Киев се огласила околу 2 часот по полноќ.

— реклама —

Украинските власти соопштија дека нивната противвоздушна одбрана соборила три руски ракети и речиси 100 беспилотни летала.

— реклама —

Во исто време, градоначалникот на Москва, Сергеј Собјанин, објави дека во текот на ноќта кон Московскиот регион биле насочени околу 600 украински дронови.

Според него, руската противвоздушна одбрана уништила 201 беспилотно летало, додека повеќето од останатите биле пресретнати пред да стигнат до регионот.

— реклама —

Во нападите бил погоден и магацин во сопственост на рускиот онлајн трговец „Вајлдберис“.

„Од вчеравечер до 6:30 часот утринава, 600 дронови летаа кон Московскиот регион, од кои 201 беа уништени“, напиша Собјанин.

Русија во последните недели ги засили воздушните напади врз Украина, додека украинските сили сè почесто ги таргетираат руските логистички и други објекти, со цел да го нарушат воениот транспорт и снабдувањето.