Ескалацијата меѓу Вашингтон и Техеран носи нов бран поскапувања на нафтата

Цените на нафтата повторно растат по најновата ескалација меѓу САД и Иран, додека застојот во преговорите дополнително ја зголемува неизвесноста на светските пазари.

— реклама —

На азиските берзи утринава цената на суровата нафта „брент“ порасна за 2,1 отсто и достигна 93,02 долари за барел, додека американската нафта WTI поскапе за 2,6 отсто и се искачи на 89,61 долари за барел.

Новиот раст следува по размената на воени удари меѓу Вашингтон и Техеран, како и по неуспехот на дипломатските напори за намалување на тензиите во регионот.

— реклама —

Во меѓувреме, американскиот претседател Доналд Трамп се соочува со сè поголем политички притисок поради растот на цените на горивата. Незадоволството кај американските граѓани расте, а високите цени на бензините стануваат едно од клучните прашања пред претстојните избори.

— реклама —

Дополнителен предизвик за администрацијата е и блокадата на Ормускиот Теснец, низ кој минува значителен дел од светската нафта. Отворањето на оваа стратешка поморска рута се смета за клучен чекор за стабилизирање на енергетските пазари.

Истовремено, Иран останува на цврсти позиции во преговорите и бара итно укинување на економските санкции, како и одмрзнување на милијарди долари приходи од нафта што се блокирани во странски банки.

— реклама —

Пазарите внимателно ја следат ситуацијата, стравувајќи дека понатамошна ескалација на конфликтот би можела дополнително да ги зголеми цените на енергенсите и да предизвика нов удар врз глобалната економија.