ЕУ го исполни дел од трговскиот договор со САД: Пад на царините за американска стока

Европскиот парламент даде зелено светло за намалување на царините за увоз на поголем број американски производи, со што Европската Унија исполни дел од обврските преземени со трговскиот договор постигнат со Соединетите Американски Држави минатата година.

Одлуката беше поддржана со 440 гласа „за“ и 151 „против“, а со неа се отвора патот за спроведување на договорените мерки за олеснување на трговската размена меѓу двете страни на Атлантикот.

— реклама —

Претседателката на Европската комисија, Урсула фон дер Лајен, го поздрави гласањето, оценувајќи дека Европската Унија го исполнува својот дел од договорот.

— реклама —

„Договорот е договор и ЕУ ги исполнува своите обврски. Со овој чекор сме на само неколку дена од исполнување на нашата заложба за укинување на царините за увоз на американска индустриска стока“, порача Фон дер Лајен.

Одлуката доаѓа откако американскиот претседател Доналд Трамп претходно предупреди дека САД би можеле да воведат значително повисоки царини за европските производи доколку Европската Унија не ги исполни договорените обврски до почетокот на јули.

— реклама —

Покрај намалувањето на царините за индустриската стока, Европската Унија го продолжи и бесцаринскиот увоз на американски јастози, мерка која првично беше договорена за време на првиот претседателски мандат на Трамп.

— реклама —

Трговскиот договор меѓу ЕУ и САД беше постигнат во јули минатата година, а предвидува укинување на дел од европските царини за американски производи и олеснет пристап за одредени земјоделски производи од САД. За возврат, Вашингтон задржа царини од 15 проценти за поголем дел од стоките што пристигнуваат од Европската Унија.

Со гласањето во Европскиот парламент е отстранета и последната поголема пречка за целосно спроведување на договорените трговски мерки.