ЕУ му дава 200 милиони евра на Гренланд: „Мора да остане со Европа, а не со САД“

Претседателката на Европската комисија, Урсула фон дер Лајен, за време на посетата на Гренланд најави пакет од 200 милиони евра наменет за овој остров, кој во последните месеци е во центарот на интересот на американскиот претседател Доналд Трамп.

„Европа донесе одлука – да биде поприсутна и поангажирана на Гренланд и на Арктикот“, изјави Фон дер Лајен на прес-конференција во главниот град Нук. Таа денеска ја завршува дводневната посета на Гренланд, автономна територија во состав на Данска.

— реклама —

Фон дер Лајен во текот на посетата повеќепати порача дека Гренланд треба да остане поврзан со Европа, а не со САД.

— реклама —

Кризата меѓу САД и европските сојузници се продлабочи на почетокот на годинава, кога Трамп повторно побара САД да го преземе Гренланд и не ја исклучи ниту можноста за употреба на воена сила. Подоцна, на 21 јануари, во говорот на Светскиот економски форум во Давос, тој изјави дека нема да употреби сила, но не се откажа од желбата САД да воспостават контрола врз островот.

Фон дер Лајен директно се осврна на ова прашање иако не го спомена Трамп по име.

— реклама —

„За иднината на Гренланд одлучуваат жителите на Гренланд и Данска. Никој друг“, порача таа.

Гренландскиот премиер Јенс-Фредерик Нилсен и данската премиерка Мете Фредериксен на истата конференција порачаа дека на Гренланд „му е потребна Европската Унија“, но и дека на ЕУ „ѝ е потребен Гренланд“.

Новите европски средства би требало да се искористат за конкретни развојни проекти, пред сè за подобрување на сателитските капацитети и обезбедување подобар пристап до интернет во северните и источните делови на островот.