ЕУ најде средства за покривање на буџетските и одбранбените потреби на Украина

Европската комисија потврди дека финансиските и воените потреби на Украина за 2026 година се целосно покриени, со што е ставен крај на неизвесноста околу недостигот од 24 милијарди евра што Киев го пријави пред еден месец.

Од Европската комисија соопштија дека преку координирани заеднички напори се обезбедени средствата потребни за покривање на украинскиот буџет и одбранбените потреби за следната година, како и дека се преземени чекори за нивна навремена исплата.

— реклама —

Прашањето се отвори откако украинскиот претседател Володимир Зеленски ги повика сојузниците да го покријат пријавениот недостиг, предупредувајќи дека испораките на неопходното оружје би можеле да бидат доведени во прашање.

Додека Киев првично говореше за недостиг од 24 милијарди евра, бројката подоцна беше намалена на 20 милијарди. Европските претставници од почетокот беа воздржани во потврдувањето на сумата, оценувајќи дека таа е неочекувана и недоволно објаснета.

— реклама —

Наместо тоа, разговорите беа насочени кон заемот од 90 милијарди евра, кој е главниот механизам за помош од Европската унија. Планот предвидува 45 милијарди евра за 2026 година и уште 45 милијарди евра за 2027 година.

Во текот на техничките разговори, Брисел инсистирал Киев да ги забрза реформите неопходни за исплата на средствата од заемот и од Инструментот за Украина. Од Европската комисија изразиле незадоволство поради бавното усвојување на потребните закони во Украина.

По обезбедувањето на средствата за 2026 година, вниманието сега се пренасочува кон финансиските потреби на Украина во 2027 година.

— реклама —

Европската комисија најави дека брзо ќе ја додели и втората половина од заемот од 45 милијарди евра, под услов да бидат исполнети утврдените услови.

Брисел и Киев треба да започнат и работа на утврдување на дополнителните буџетски и одбранбени потреби, додека Европската комисија ги повика и другите сојузнички држави да ги зголемат своите финансиски придонеси.

— реклама —

Украинскиот министер за финансии Сергиј Марченко претходно изјави дека неговата земја во 2027 година би можела да се соочи со недостиг од 69,3 милијарди евра. Од нив, според неговите проценки, 29 милијарди евра би се однесувале на буџетот, а 40 милијарди евра на воените трошоци. Европската комисија засега не ги потврди овие бројки.

По објавата од Брисел, Зеленски ги поздрави резултатите од билатералните разговори за потребите на Украина во 2026 и 2027 година, додавајќи дека двете страни договориле формат, рокови и чекори за обезбедување целосна покриеност.