Нов трговски спор се отвора меѓу Брисел и Бразилија откако Европската Унија го запре увозот на бразилско месо, повикувајќи се на непочитување на строгите европски правила за безбедност на храната. Од Бразил веќе стигна предупредување дека, доколку забраната остане во сила, „сите опции се на маса“.
Европската комисија ја активираше одлуката со која Бразил е отстранет од листата на земји што ги исполнуваат условите за извоз на месо на европскиот пазар. Како главна причина се наведува употребата на антибиотици за поттикнување на растот кај животните, практика која не е дозволена според правилата на Европската Унија.
Одлуката стапи во сила неделава, по инспекциски наоди според кои Бразил повеќе не ги исполнува европските услови за безбедност на храната. Европските власти паралелно спроведуваат ревизија поврзана со увозот на живинско месо и мед.
Од Европската комисија наведуваат дека од бразилските власти не добиле доволно гаранции што би овозможиле редовна и сигурна контрола врз производството на говедско месо.
Бразилскиот амбасадор при Европската Унија, Педро Мигел да Коста е Силва, остро реагираше на одлуката. Тој смета дека ревизиите и инспекциите на терен не биле неопходни бидејќи, како што тврди, Бразил веќе доставил доволно гаранции за квалитетот и безбедноста на своите производи.
„Немаше потреба од ревизија, ниту за живината, ниту за медот, ниту за говедското месо, бидејќи такви контроли не се спроведуваат за други земји. Дадовме доволни гаранции“, изјави Да Коста е Силва, пренесува „Јуроњуз“.
Амбасадорот потврди дека разговорите со Европската комисија ќе продолжат, но предупреди дека Бразил би можел да преземе контрамерки доколку неговите земјоделски производи продолжат да имаат ограничен пристап до европскиот пазар.
Бразил е меѓу најголемите светски извозници на говедско и пилешко месо, па прекинот на испораките кон европскиот пазар може да има пошироки последици врз трговијата и снабдувањето со месо.
Евентуалните промени на европскиот пазар може индиректно да се одразат и врз земјите од регионот, вклучително и Македонија, особено доколку дојде до промени во цените на суровините и месните производи на европскиот пазар.
