Лажна тревога во авион на летот од Италија кон Брисел: Пронајдена порака со зборот „бомба“

Нова серија лажни дојави за поставени бомби предизвика безбедносни проверки на европските аеродроми, откако во авион на летот од италијанскиот град Пескара кон Брисел била пронајдена порака со натпис „бомба“.

— реклама —

Според италијанските медиуми, пораката била откриена во тоалетот на авионот кратко по полетувањето од Италија. Пилотот веднаш ја известил контролата на летање, а по слетувањето на аеродромот Шарлроа во Брисел бил активиран кризен протокол.

— реклама —

Патниците биле безбедно евакуирани, а авионот и багажот биле детално проверени со помош на полициски кучиња обучени за откривање експлозиви. По проверките било потврдено дека станува збор за лажна тревога, по што започнало повторното качување на патниците за повратниот лет кон Пескара.

— реклама —

Претходно во текот на денот, сомнителна дојава била примена и за авион што летал од Варшава кон Брисел. Леталото утринава слетало на бриселскиот аеродром, а по полициската истрага било проценето дека нема потреба од дополнителни безбедносни мерки.

— реклама —

Според информациите, околу 20 летови низ Европа биле мета на лажни дојави за поставени бомби. Аеродромските служби соопштиле дека благодарение на координацијата со надлежните институции, инцидентите биле решени без поголемо нарушување на работата на аеродромот.