Евакуиран авион на „Ер Србија“ во Сплит по дојава за бомба, уапсен 75-годишник

Авион на „Ер Србија“, кој попладнево требало да полета од Сплит за Белград, бил евакуиран откако 75-годишен патник му кажал на персоналот дека во авионот има бомба. Патникот потоа рекол дека се шегувал.

Полицијата го уапсила, а по извршениот противексплозивен преглед на авионот, патниците и багажот било утврдено дека нема експлозивна направа.

— реклама —

Сплитско-далматинската полиција соопшти дека авионот по завршениот преглед ја напуштил аеродромската зграда и нешто пред 19 часот полетал кон Белград.

„На аеродромот во Сплит е извршен противексплозивен преглед на авионот, патниците и багажот. При прегледот не е пронајдена експлозивна направа, по што авионот со патниците го напушти аеродромот“, соопшти полицијата.

— реклама —

Против 75-годишниот маж е во тек криминалистичка истрага поради сомнение за предизвикување лажна тревога.

Авионот требало да полета во 15:20 часот. Полицијата претходно соопшти дека околу 15:25 часот, додека се наоѓал во авионот пред полетувањето, мажот му кажал на персоналот дека во авионот има бомба, а потоа рекол дека се шегува.

— реклама —

Авионот бил испразнет, по што полицијата започнала детален преглед на леталото, патниците и багажот.

Еден од патниците изјавил дека во авионот одеднаш влегле неколку полицајци, дел во униформи, а дел во цивилна облека. Според него, полицајците го извеле мажот кој седел во третиот или четвртиот ред.

Патниците во почетокот не знаеле што се случува, а кога еден од нив ја прашал стјуардесата за објаснување, таа одговорила дека патникот го споменал зборот „бомба“.

Поради страв, неколку патници го напуштиле авионот, а пилотот околу 15:40 часот преку разгласот ги известил сите дека мора да излезат бидејќи леталото треба да биде проверено од безбедносни причини.