Еврокомесарката за проширување Марта Кос порача дека Македонија може да го продолжи пристапниот процес кон Европската Унија, но притоа нагласи дека за тоа е потребно исполнување на преземените обврски поврзани со уставните измени.
Во интервју за Бугарската национална телевизија во Стразбур, Кос посочи дека Европската комисија во оваа фаза подготвува патокази со технички чекори за Црна Гора, Албанија, Молдавија и Украина. Македонија не е меѓу земјите опфатени со оваа најава, но, според Кос, напредокот на другите држави од Западен Балкан може да биде поттик и за Скопје.
Таа оцени дека претстојната есен ќе донесе засилување на процесот на проширување, со фокус на забрзување на пристапните преговори и подготовка на Унијата за прием на нови членки. Во тој контекст, како земји од регионот кои би можеле да продолжат напред ги посочи Македонија, Босна и Херцеговина и Косово.
Говорејќи за уставните измени, Кос изјави дека Владата во Скопје треба да го исполни преземеното ветување и да го промени Уставот, за да може пристапниот процес да продолжи.
„Тие мора да го променат својот Устав; ова е договорено меѓу Северна Македонија и 27-те земји членки на ЕУ. Откако ќе биде направено ова, ќе сметам на поддршката и на вашата земја за да можеме да продолжиме напред и со Северна Македонија“, изјави Кос.
Таа истакна дека проширувањето на ЕУ не може да се спроведе без поддршка од сите земји членки и нивните граѓани.
Кос во интервјуто се осврна и на европските планови за поврзување со Јужен Кавказ, Централна Азија и Блискиот Исток, при што Средниот коридор го издвојува како еден од значајните проекти на актуелната Европска комисија за отворање нови трговски и енергетски врски меѓу Европа и Азија.
Таа најави дека во октомври ќе ги посети Турција и Бугарија, каде што ќе разговара за инфраструктурни проекти, меѓу кои железничката врска меѓу Истанбул и бугарската граница, како и за модернизација на железничката и патната инфраструктура во Бугарија.
Изјавите на Кос доаѓаат по говорот за состојбата на Унијата на претседателката на Европската комисија, Урсула фон дер Лајен, во кој беше најавена подготовка на патокази за кандидатите кои се најнапредни во пристапниот процес.
