Марта Кос: Западниот Балкан е клучен за поврзувањето на Европа

Бугарија има стратешка улога во поврзувањето на Европа со регионот на Црното Море и Турција, оцени еврокомесарката за проширување Марта Кос на меѓународната министерска конференција за Коридорот VIII во Софија.

„Работиме на подобро поврзување на луѓето за иднината. Бугарија е портата кон Европа за регионот на Црното Море и Турција. Западниот Балкан има клучна улога во поврзувањето тука“, рече Кос.

— реклама —

Таа посочи дека во моментов во Западниот Балкан се спроведуваат повеќе од 130 проекти, кои опфаќаат изградба на нови патишта и железници, како и унапредување на граничните премини.

Кос нагласи дека визијата на Европската Унија не се однесува само на развојот на инфраструктурата, туку и на идното интегрирање на регионот.

— реклама —

„Верувам дека еден ден целиот Западен Балкан ќе биде дел од нашата Европа“, рече еврокомесарката.

— реклама —

Според неа, со идното интегрирање на регионот во Европската Унија, граничните премини и патиштата нема да имаат исто значење како денес, бидејќи земјите ќе бидат дел од „една Европа што работи заедно“.

„Тоа е визијата на која работиме во Брисел, тука во Софија, во Западниот Балкан и, секако, во земјите-членки“, додаде Кос.

Еврокомесарката е во работна посета на Бугарија и учествува на меѓународната министерска конференција за Коридорот VIII во Софија. Домаќин на конференцијата е бугарската министерка за надворешни работи Велислава Петрова.

За време на посетата е предвидена и средба на Кос со бугарскиот премиер Румен Радев.