Марта Кос: Слободата на медиумите, правата на ЛГБТИ-заедницата и локалната демократија во Турција дополнително го продлабочува јазот меѓу Анкара и Европската Унија

Состојбата со слободата на медиумите, правата на ЛГБТИ-заедницата и локалната демократија во Турција дополнително го продлабочува јазот меѓу Анкара и Европската Унија. Ова го изјави еврокомесарката за проширување, Марта Кос, предупредувајќи дека најновите случувања негативно влијаат врз европските амбиции на земјата.

Кос говореше во турскиот град Едрене, во близина на границата со Бугарија, каде што посочи дека состојбите во овие области ја оддалечуваат Турција од нејзината цел за членство во ЕУ.

— реклама —

Таа најави дека загриженоста на Брисел ќе биде отсликана во следниот извештај за проширувањето, кој треба да биде објавен на 28 октомври. Кос нагласи дека јавно и јасно ќе укажува на утврдените проблеми.

— реклама —

Турција и натаму има официјален статус на земја кандидатка за членство во ЕУ. Нејзините европски интеграции траат со децении, а пристапните преговори, започнати во 2005 година, со години се во целосен застој.

Односите меѓу Анкара и Брисел значително се влошија по неуспешниот обид за државен удар во јули 2016 година и последователните чистки насочени кон политичките противници и новинарите. Европската Унија оттогаш ја повикува Турција да ги унапреди демократските стандарди.

— реклама —

Дополнителен извор на несогласувања е и прашањето за поделениот Кипар. Турција во 1983 година ја прогласи Турската Република Северен Кипар, која ја признава единствено Анкара. ЕУ бара обновување на преговорите под покровителство на Обединетите нации за решавање на статусот на островот. Турскиот претседател Реџеп Таип Ердоган во јули 2024 година го отфрли тој пристап, залагајќи се за меѓународно признаено решение со две држави.

Во меѓувреме, турските власти се соочуваат со критики поради постапките против припадници на ЛГБТИ-заедницата, новинари и претставници на опозицијата. Во рамките на кампањата „Моето семејство е безбедно“, насочена против ЛГБТИ-заедницата, биле уапсени повеќе лица, а биле затворани и кориснички сметки на активисти на социјалните мрежи.

Приведувања имало и во одделни случаи поврзани со новинари и опозициски градоначалници. И покрај протестите на Европската Унија и на неколку меѓународни невладини организации, турската влада најавила дека ќе продолжи со кампањата против ЛГБТИ-заедницата.