Сè поголем број европски држави одбиваат да им помогнат на САД во воените операции против Иран, продлабочувајќи ги тензиите меѓу Вашингтон и европските сојузници и отворајќи сериозни прашања за единството во НАТО.
Според информации на Reuters, Франција и Италија им се приклучиле на Шпанија во забраната за користење на нивната инфраструктура за американско-израелските воени операции, што претставува јасен сигнал за дистанцирање од актуелната стратегија на Вашингтон.
Овие одлуки доаѓаат во период на веќе зголемени тензии, откако американскиот претседател Доналд Трамп претходно ги шокираше европските сојузници со изјави за преземање на Гренланд, а сега јавно ги критикува поради одбивањето да се вклучат во конфликтот.
„Државата Франција не дозволи прелет преку својата територијa на авиони кои летаа кон Израел натоварени со воена опрема. Франција беше МНОГУ НЕКООПЕРАТИВНА во врска со ‘Месарот од Иран’, кој беше успешно елиминиран! САД ќе го ЗАПАМЕТАТ ова!!! Претседател ДЏТ.“, напиша Доналд Трамп.
Дополнителен удар за Вашингтон пристигна и од Полска, која одби да ги распореди своите системи „Патриот“ на Блискиот Исток.
Полскиот министер за одбрана Владислав Косинијак-Камиш соопшти дека приоритет останува заштитата на националниот воздушен простор и источниот крил на НАТО.
„Овие системи се користат за заштита на полскиот воздушен простор и источниот крил на НАТО, по тоа прашање ништо не се менува и нема никаков план за нивно преместување“, изјави Косинијак-Камиш.
Меѓу најгласните критичари на американско-израелската операција е шпанскиот премиер Педро Санчез, кој ја оцени акцијата како кршење на меѓународното право и одби да дозволи користење на воени бази и воздушен простор за овие операции.
Италијанската премиерка Џорџа Мелони исто така јасно се дистанцираше од воената ескалација, потенцирајќи дека Рим нема намера да влегува во конфликт.
„Италија не е во војна и не сака да оди во војна“, изјави Џорџа Мелони.
Според информациите, Италија дури одбила да дозволи слетување на американски воен авион во базата Сигонела на Сицилија, дополнително нагласувајќи го јазот меѓу европските престолнини и Вашингтон.
Серијата одбивања сигнализира сè поизразено дистанцирање на Европа од воената политика на САД на Блискиот Исток и отвора нова фаза на несогласувања во рамките на западниот сојуз.
